خطوات تصميم كارت شخصى ( الجزء الثانى) 2

بواسطة Sherifer921 | 17:51 في دروس تصميم دعائى |

خطوات تصميم كارت شخصى ( الجزء الثانى) 2

بسم الله الرحمن الرحيم

نبدأ على بركه الله درس النهارده
النهارده بقى يا جماعه اعذرونى انا حاتكلم عن الكروت الشخصيه تانى وده راجع لان الكروت الشخصيه دى اهم واكتر حاجه بيشغل فيها المصمم فى مكتب الدعايه لان مكاتب الدعايه العاديه نشاطها الاساسى قائم على الكروت الشخصيه
بس النهارده حنتكلم عن الكروت الشخصيه من جهه تانيه غير جهه التصميم
حنتكلم من جهه التصميم لما بيتطلب منك
دلوقتى انت راجل شغال فى مكتب خلاص
جالك المندوب ومعاه بيانات الكارت
قالك البيانات اهى
عاوز التصميم دلوقتى علشان الحق ادى البروفه للعميل
حتعمل ايه
تقوم فاتح صفحه التصميم زى ما قولنا على المقاس بتاع الكارت العادى
وتبدا تشتغل
طب ايه اللى حتعمله بالظبط علشان تخلص التصميم فى اسرع وقت
اولا : تجيب خلفيه للكارت ( وخلى بالكم الخلفيه دى بالذات المندوب الشاطر بيقرا دماغ العميل وبيقولك اذا كان العميل عاوز الكارت هادى ولا غامق ولا مليان )
ف لو العميل عاوز الكارت هادى بتختار خلفيه هاديه ولو عاوزه غامق بتختار غامقه وهكذا
ثانيا: تكتب بيانات الكارت وبعد ما تخلص كتابه البيانات تنسق البيانات من حيث
الحجم والشكل والتوزيع
الحجم : هوه انك تراعى ان فيه كلام حيبقى حجمه كبير بالعاده وكلام اصغر منه
( اسم الكارت مثلا بيبقى اكبر من العنوان واسم المدير اكبر من رقم الموبايل وكده)
الشكل : وده يعنى الخط اللى حتستخدمه فى الكتابه
طبعا الخط اللى حتستخدموه هوه الخط العادى خالص بس اسم الكارت طبعا ممكن تكتبه بفونت تانى مميز شويه وبرضه اسم المدير ممكن يتكتب بفونت مميز بس يكون زى الفونت اللى اتكتب بيه اسم الشركه وبقيه البيانات بالفونت العادى خالص
معنى كده ان الكارت الواحد المكتوب بالعربى الاحسن والاسرع انك متستخدمش فيه غير خطين
الخط العادى وخط تانى مميز ( اندلسى- فارسى ...... الخ )
التوزيع : وده برضه مهم جدا
التوزيع ده عباره عن ايه
التوزيع عباره عن انك تنسق بيانات الكارت فى مساحه الكارت نفسه
بحيث فى الاخر تلاقى بيانات الكارت مترتبه كويس ومتوزعه تمام فى الكارت
يعنى اسم الكارت مثلا يبقى فوق خالص فى النص زى الكارت اللى جبتهولكم قبل كده
وممكن برضه يتحط فوق على اليمين
وتحت اسم الكارت يتحط اسم النشاط ( زى ما موجود فى الكارت اللى جبته قبل كده)
وفى النص يتكتب اسم المدير وتحته على طول رقم موبايله
واخيرا تحت خالص فى النص يتكتب العنوان وارقام التليفونات
يبقى كده خلاص احنا اتكلمنا عن
أولا/ خلفيه الكارت ثانيا/ كتابه بيانات الكارت
ثالثا بقى/ الوان الكتابه
ودى بتكون على حسب لون الخلفيه
يعنى لو الخلفيه زرقاء يبقى اللون الاحمر حيبان عليها
بترجع فى الاخر للمصمم
بس على قد ما تقدر ما تحطش الوان كتير
يعنى مثلا اسم الشركه بلون ظاهر عن لون الخلفيه
وكمان اسم المدير نفس النظام ويفضل ان اسم المدير يبقى بنفس اللون بتاع اسم الشركه
لون العنوان دايما بيبقى اسود وواخد تحديد ابيض او يبقى اللون ابيض وواخد تحديد اسود
وخلى بالكم التحديد strock
مهم جدا
يعنى كل البيانات تديها تحديد ابيض علشان تظهر اكتر وكمان شادو اسود
والكلام ده كله حتلاقوه فى
Blending Options
رابعا : فاض الصور بتاعه الكارت
ودى طبعا على حسب النشاط بتاع صاحب الكارت
يعنى كارت السنترال يبقى فيه صور موبايلات ولوجوهات فودافون وموبينيل والكلام ده
وكارت السيارات يبقى فيه صور سيارات طبعا وصور لوجوهات شركات السيارت
وكارت السوبر ماركت يبقى فيه صور مواد غذائيه وهكذا فى اى كارت
ودايما فى الصور اللى بتحطها فى الكارت لازم تكون مقصوصه كويس
وطبعا توزعها فى الكارت بشكل كويس
ويفضل تديها outer glow
علشان تبان اكتر
خلاص كده الكارت خلص
طبعا زى ما قولت قبل كده اكتر حاجه بتخلى مصمم الدعايه المبتدىء ياخد وقت فى تصميم الكارت هي الخلفيه والكتابه
بعد الكلام اللى قولناه ده متهيالى مفيش صعوبه
ومع التمرين ومع كتر الشغل ومع الخبره حتعمل الكارت وانت مغمض
وحيجيلك المندوب تقوله استنى عشر دقايق والتصميم حيبقى جاهز
اتعرضنا النهارده خلاص للكروت الشخصيه مره تانيه واعذرونى على تكرار الكروت بس صدقونى هيا دى اكتر حاجه حتواجهكم لو اشتغلتوا فى مكتب دعايه علشان كده عاوز اتأكد انكم شربتوها
دلوقتى بقى نيجى للجزء العملى بتاعنا
واللى بيحدد لكل واحد فيكم هوه استفاد من الدرس ولا لأ
دلوقتى انا حاعتبر نفسى مندوب وانتوا المصممين
وحاديكم بيانات كروت وانتوا تصمموها
وكل واحد يصمم الكارت يجيبه هنا ويوريهولى ويقول هوه قعد فيه قد ايه
وانا احددله العيوب اللى فى الكارت
على فكره الكلام ده مهم جدا علشان لو واحد فيكم راح يقدم فى مكتب
حيقعدوه على الكمبيوتر ويقولوله قدامك الصور اللى عندنا والفونتات وكل حاجه
اعملنا كارت سنترال مثلا
ف انت لو متدرب كويس حتعمل الكارت بسرعه وكفاءه
حيقوم صاحب المكتب مشغلك على طول
------------------
البيانات
اولا / تصميم كارت لشركه قطع غيار سيارات
اسم الشركه: اليكس كار
نوع النشاط: قطع غيار السيارات
اسم المدير/ محمد سعيد
رقم موبايل المدير / 0105558884
العنوان/ 88 شارع ملك حفنى – سيدى بشر – الاسكندريه
رقم تليفون الشركه / 5412874
الراجل ده عاوز الكارت هادى
وعاوز صوره عربيه اوبل
وعاوز لوجو فولكس فاجن واوبل وسكودا ورينو
خلاص اهو معاكم بيانات الكارت اعملوه
-------------
ثانيا / تصميم كارت سنترال
اسم السنترال / موبى فون
نوع النشاط / مكالمات محليه ودوليه وكروت شحن واكسسوارات موبايلات وتحويل مكالمات للمنازل
اسم المدير/ احمد على
موبايل المدير/ 0107854985
العنوان / 56 شارع الجبرتى – باب شرق – الاسكندريه
رقم تليفون السنترال/ 4857459
الراجل عاوز الكارت غامق
وعاوز لوجو فودافون وموبينيل وكام صوره لموبايلات حديثه

خلصنا خلاص درس النهارده ومستنى تطبيقهم واللى ميعرفش الفوتوشوب مش مطلوب منه غير الادوات اللى فى الصوره والكلام ده برضه للى بيعرف الفوتوشوب
واعدادات المقاس
9 عرض و 5 طول وريزليوشن 300
مستنى تطبيقكم ويا ريت تشرفونى
والسلام عليكم ورحمه الله وبركاته

 

12 comments:

1. Ahmed Elshwa on 30 August 2008 at 11:58

   السلام عليكم ورحمة الله
   
   إزيك يا شريف اخبارك ايه
   
   اول تطبيق عملته كارت اليكس كار يارب يكون كويس هو اخد منى وقت شوية عشان اقص العربية بشكل كويس
   
   بس انا بواجه مشكله انى مش عارف اجيب اللينك بتاع الصورة
   
   http://img507.imageshack.us/my.php?image=57495350ja2.jpg

    
2. Ahmed Elshwa on 30 August 2008 at 12:33

   ده تانى تطبيق ليا بس بردو مش عارف اخلى الصورة تظهر زى ما انت عاملها فى الشرح بتاعك بس انا حاطط اللينك بتاعها
   مستنى تقيمك للتطبيقات بتاعتى
   
   
   http://img337.imageshack.us/my.php?image=64453995sg9.jpg

    
3. Sherifer921 on 30 August 2008 at 16:05

   اهلا بيك يا احمد
   ويلا بينا نشوف تطبيفاتك
   - بالنسبه لكارت اليكس كار
   مبدأيا الكارت ممتاز واوجه القوه هي فى تناسق الوانه ( احمر ازرق كتابه ابيض ) لا تمام اوى كده
   توزيع البيانات سليم برضه بس كلمه لقطع غيار السيارات كانت محتاجه تطلع فوق شويه
   عيوب الكارت الوحيده هى اختيار الخطوط ( الفونت ) يعنى مثلا فونت كلمه ( اليكس كار ) كويس بس المشكله انه فكاهى شويه فبالتالى مينفعش فى كارت عربيات وكذلك فونت لقطع غيار السيارات متكسر شويه ومش واضح اوى والفونت الباقى بتاع كلمه الاداره ومحمد سعيد والعنوان
   الفونتات فعلا هى تقريبا اوجه العيوب الوحيده فى الكارت ده
   وانا عارف ان اغلب الناس بتتزاول فى الفونتات العربى علشان كده انا باجهز لكام فونت عربى حيكونوا من الاخر وتمام اوى ان شاء الله
   وبالنسبه ل لينك الصوره بعد ما ترفعها حيديلك صفحه كلها لينكات اختر اخر لينك تحت خالص فى اخر الصفحه واعمله كوبى
   - بالنسبه لكارت موبى فون
   الكارت ممتاز جدا برضه والوانه جميله وتوزيع البيانات كويس جدا وبرضه عيبه الوحيد هوه الفونتات
   بس بجد يا احمد شغلك ما شاء الله كويس جدا يا ريت تقولى انت بتصمم من قد ايه واذا كنت انت اشتغلت مصمم فى مكتب قبل كده ولا لأ وكمان تقولى بتقدر تنجز الكروت دى فى وقت قد ايه
   مستنى ردك
   وشكرا

    
4. Ahmed Elshwa on 30 August 2008 at 17:09

   ألف شكر ليك يا شريف على متابعتك للتطبيقات
   
   ان شاء الله هحاول اتفادى الاخطاء اللى قولتلى عليها المره الجاية وياريت تدينى حاجة جديدة اطبقها عشان اقولك الوقت بالظبط اللى انجزت فيه الكارت لأن الكروت دى اخدت منى وقت بس عشان مكنش عندى لوجوهات خالص وفضلت اقص فى العربية واللوجوهات عشان كده طول معايا بس لو كل حاجة موجوده مش هياخدو معايا وقت خالص
   
   أنا بدأت التصميم من فترة قريبة جدا وما اشتغلتش فى مكاتب قبل كده بس ان شاء الله على ايدك ممكن افكر اشتغل فى مكتب جنب الشغل بتاعى
   
   ومستنى منك شوية خطوط كويسه

    
5. Sherifer921 on 31 August 2008 at 05:15

   اهلا بيك مره تانيه يا احمد
   لا بس طالما انت بدأت التصميم من فتره قريبه يبقى بجد انت مشروع مصمم ناجح ان شاء الله لان شغلك جيد فعلا
   وان شاء الله حاجهز كام تطبيق جديد تعملهم وحاجهزلك معاهم الصور واللوجوهات وكل حاجه كأنك قاعد فى شركه بالظبط علشان تصمم على طول ومتاخدش وقت وتقولى قعدت فيهم قد ايه بالاضافه لمجموعه الخطوط
   وبالتوفيق للجميع
   وشكرا

    
6. Ahmed Elshwa on 31 August 2008 at 11:40

   ربنا يخليك يا شريف انا منتظر التطبيقات الجديده بفارغ الصبر ويارب على ايدك اكون مصمم كويس

    
7. Anonymous on 16 September 2008 at 13:13

   بجد شغل أكتر من رائع يا شريف وكنت أتمنى تقول رأيك في الكارت ده
   
   
   
   http://img58.imageshack.us/img58/3706/38258307dl7.jpg
   
   وده تصميم لكارت ليا

    
8. Sherifer921 on 17 September 2008 at 12:48

   اهلا يا اسر ونورتنى
   بالنسبه للكارت
   هوه ليه بس انت عارفين كيرفات وارضيه تانيه ورا الكارت
   هل انت قصدك ان الكارت هوه اللى فوق الارضيه؟
   عموما حتى لو هوه اللى فوق الارضيه بس احب اقولك انه ممكن يتطبع ويتقص كده عادى بس التكلفه حتزيد شويه
   نتكلم عن الكارت
   اكتر حاجه لفتت انتباهى توزيع البيانات الجميل ده اللى موضح كل البيانات اللازمه بحيث اللى يمسك الكارت يعرف على طول صاحب الكارت عاوز يقول ايه
   والخلفيه برضه كويسه
   بس انا عن نفسى شايف ان بلاش البنفسج
   بيخلى التصميم مكتوم شويه من وجهه نظرى بس هوه مش وحش بس جرب كده الازرق مثلا
   عموما التصميم كويس ومستنى منك تطبيقات تانيه

    
9. Anonymous on 28 May 2010 at 07:34

   هلا ازيك يا شريف اخبارك اول تطبيق لي من دروسك الروعه يا مبدع التصميم اخد معي حوالي 20 دقيقه مع العلم اني ماعندي امكانيات بالكوبيوتر تبعي لا خطوط ولا صور وحملت الفتوشوب مخصوص عشان اطبق كلامك الزي العسل
   
   الرابط :
   http://www5.0zz0.com/thumbs/2010/05/28/14/559197045.jpg
   
   اسمي ساطع ابوعبيدة
   من السودان

    
10. Anonymous on 28 May 2010 at 07:39

    اسف الرابط صغير خد الرابط مرة تانيه
    http://www10.0zz0.com/2010/05/28/14/157067820.jpg

     
11. عمار أحمد العوضي on 30 May 2010 at 02:50

    السلام عليكم ورحمة الله وبركاته
    أولا أحب أشكر صاحب المدونة شريف على مدونته وتدويناته الرائعة وعلى إفادته لنا
    وأحب أعرض تطبيقى للكارت الثانى وأرغب أن تخبرنى الأخطاء التى فيه
    والرابط
    http://store2.up-00.com/May10/2W212729.jpg
    
    أو
    
    http://www.7ammil.com/upfiles/T3u12724.jpg
    
    واخيرا أحب أسأل عن مقاس الكارت الشخصى الصغير هل هو هذا هذا ما صممناه أم هو آخر وأرجو توضيح إن كان بالبيكسل أو السنتيمتر
    وشكرا

     
12. مكرم نعيم فهمى باخوم on 26 January 2017 at 03:26

    بو سمحت انت بتسخدم اى اصدار من الفوتوشوب

     

Post a Comment