السلام عليكم ورحمه الله وبركاته

ده اول درس جديد ليا هنا والدرس ده انا مش حطه غير هنا وبس وكل الدروس الجديده حتبقى بنفس النظام ان شاء الله

انا حتكلم فى الدرس ده عن حاجه مهمه جدا

الحاجه دى هيا لو انا دلوقتى راجل مبتدأ ومعرفش اى حاجه خالص عن التصميم ولا الطباعه ولا اى حاجه فى الدعايه بس عاوز اشتغل فيها لانى المجال ده بيشدنى اعمل ايه

السؤال ده اتعرض عليا كتير جدا

لان فيه ناس كتير جدا برضه نفسها تشتغل فى الدعايه بس لسه مبتدأين

لو انت راجل مبتدأ ومتعرفش اى حاجه فى الدعايه لازم من دلوقتى تحاول تحدد هدفك

هل انت عاوز تبقى مصمم جرافيك وبس فى شركه دعايه

ولا عاوز بجانب انك مصمم انك تقدر تطبع تصميماتك وتسوقها وتبيعها بعد كده

ندخل فى اول مرحله وهى انك تبقى مصمم

التصميم الدعائى عامه بسيط ومش محتاج عقليه جباره ولا حاجه

ممكن تبدأ بتعلم برنامج الفوتوشوب

والفوتوشوب على فكره سهل جدا جدا جدا فى حد ذاته كتعلم البرنامج والادوات

لكن المشكله بعد كده هيا فى التطبيق

يعنى لازم تعرفوا ان اسهل مرحله فى الدعايه هيا تعلم الفوتوشوب

بجد دى اسهل مرحله على الاطلاق

اللى اصعب منها بقى هيا مرحله التطبيق

مرحله التطبيق دى بقى بتكون بعد ما بتجيد البرنامج وتمسكه فى ايدك كويس

ساعتها حتقدر تلعب بيه

نيجى للتطبيق

التطبيق بيتطلب منك انك تشوف شغل غيرك علشان تتعلم

تشوف ايه الافكار

تشوف ايه الحاجات اللى عجبتك وتتعلم منها

تنمى معرفتك بتصميمات غيرك

وبعد كده تبدأ تطبق انت وتشغل مخك

ساعتها حتلاقى نفسك بتعمل تطبيقات كويسه جدا وفيها ملامح تفكيرك بجانب اللى انت اتأثرت بيه

كده انت بقيت على اول السلم

نتكلم عن المرحله الاصعب

بعد ما خلاص انت اتعلمت البرنامج وحطيت رجلك على اول سلم فى التطبيق

لازم بعد كده تطبق كتير جدااااااااااااا ولكافه المستويات

يعنى تعمل تصميمات تجاريه للميكانيكى والبقال ومراكز بيع الكمبيوتر والسيارات وشركات الملاحه والتوكيلات وهكذا ......

كده انت حتدخل فى مرحله التنويع

بمعنى انك تقدر تصمم اى شغل يتطلب منك على الاطلاق

يعنى التصميم اللى البقال او الميكانيكى عاوزه انت تقدر تطلعه بالشغل اللى صاحب الشغل عاوزه وباقل مجهود

والتصميم اللى عاوزه توكيل السيارات او شركه الملاحه حتعمله على اعلى مستوى وبمجهود مش كبير

وكل ما تطبيقاتك تزيد كل ما ثقتك فى نفسك حتزيد اوى

حتبقى قاعد كده وبتصمم اى شغل وانت مغمض

مع الوقت حتلاقى مستوى شغلك بيتطور وانك بتشتغل فى شركات مستواها اعلى وبالتالى مستوى عملائها اعلى

يعنى الشركات اللى انت فى الاول لما كنت شغال فيها وكان بيتطلب منك تصميمات للميكانيكى والبقال مع الاحترام للميكانيكى والبقال

الشركات دى انت حتسيبها وتشتغل فى شركات اعلى ومستوى عملائها اعلى

بالتالى مش حتاخد غير على الشغل العالى وبس

كده انت بقيت مصمم دعائى ممتاز واى شركه دعايه كبيره تتمنى انك تشتغل معاها

تانى مرحله بقى هيا مرحله ازاى تتعلم تطبع شغلك

المرحله دى كمان صعبه جدااااااااااااااااا

لان لازم تبقى عارف الطباعه ماشيه ازاى

لازم تبقى عارف التصميم اللى انت بتخلصه بيعدى عليه كام مرحله لحد ما يبقى مطبوع على ورقه

وطبعا علشان تعرف كل ده لازم تدخل فى الواقع العملى

وتسأل كتير وتلف كتير وتلبس شغل كتير

كل ده علشان تتعلم

بس لو وصلت للمرحله دى

انك تطبع شغلك بنفسك

وكمان تنفذ شغل لعملاء مع نفسك

من اول التصميم مرورا بالطباعه واخيرا تسليم الشغل واستلام الفلوس

كده انت بقيت بتضيف عائد زياده فوق العائد اللى بيدخلك من شغلك فى التصميم

فيه ناس بتختار انها تبقى من المصممين وبس وبيقولوا علشان اقدر اركز واعمل سوق لتصميماتى

وفيه ناس بتختار انها تشتغل فى الاتنين ودى اللى طموحها عالى

هنا فى المدونه حنتكلم عن كل دول بالتفصيل ان شاء الله فى الدروس الجايه

اتمنى انى اكون جاوبت على استفسار اى حد مبتدأ

وخليكوا متابعين دايما معايا علشان فيه دروس متجدده على طول ان شاء الله

وبالتوفيق للجميع

وشكرا

تصميم البروشور
بسم الله الرحمن الرحيم
اهلا بيكم فى درس النهارده وانا اسف انى اتاخرت جدا جدا جدا فى الدرس ده بس معلش اعذرونى
ندخل فى درسنا
درس النهارده حنتكلم فيه عن تصميم البروشور او البانفلت
ايه هوه البروشور
هوه عباره عن كتالوج مصغر بتحتاجه الشركات والهيئات والمراكز التجارية المختلفه لتسويق منتجاتها او خدماتها
طب ايه فائدته
فائدته انه بيدى للشركة اللى طابعاه واجهه جامده طالما كان البروشور انيق وتصميمه جذاب
ويعتبر برضه من اهم الوسائل اللى بتلجأ ليها الشركات لتسويق خدماتها
نضرب مثال بشركه تصميم مواقع ويب وخدمات كمبيوتر
شركة زى دى علشان تعمل دعايه كويسه ومنظر جامد قدام العميل يبقى لازم تعمل بروشور بتعرض فيه نبذه عن الشركه والخدمات اللى بتقدمها والاسعار
وكل ده فى بروشور تصميمه بسيط ومش معقد وجذاب وصغير وشيك
وبتدى البروشور ده لعملائها وكمان للشركات العاديه اللى بتحتاج لخدمات الشركه صاحبه البروشور
خلاص كده عرفنا ايه هوه البروشور وايه هيا فائدته
نيجى بقى للحته الصعبه
بالنسبه لتصميم البروشور يا جماعه مش مطلوب فيه السرعه اوى زى الكروت لان البروشور لازم يكون متصمم بذمه زياده اوى عن الكروت وغير كده البروشور اهم الف مره من الكارت الشخصى وكمان الفلوس اللى بتيجى من وراه اكتر وغير كده البروشور لما بتطبعه شركه الدعايه لحد بيبقى سعره فى الغالب عالى اوى وده على حسب العميل
الحتة الصعبه هنا بقى انى فى التطبيقات مش حاطلب منكم بروشور كامل
لا
حناخد النهارده اهم حاجه فى البروشور وهيا واجهه البروشور او الصفحه الرئيسيه بلغه النت
بصوا يا جماعه
المصمم الدعائى لازم يراعى فى الواجهه بتاعه البروشور كل حاجه
لان دى اهم حاجه فى البروشور كله
بمعنى ان الالوان تبقى متناسقه سواء الوان الخلفيه او الوان الكتابه او الوان الصور وكمان تراعى حته توزيع البيانات والصور كويس اوى وكمان تراعى الخطوط
من الاخر لازم تطلع الواجهه فى الاخر شيك
فيه حته مهمه عاوز اوصلهالكم برضه
ان مش معنى ان الواجهه تبقى كويس يبقى نقوم نملى الواجهه على الاخر بالصور والكتابه والكلام ده كله
بالعكس ده ممكن تعمل واجهه جباره بتصميم بسيط جدا جدا جدا
والموضوع ده بيختلف من مصمم لاخر
بس طبعا المهم عندنا سواء الواجهه مليانه او بسيطه انها فى الاخر تطلع كويسه
نروح بقى نشوف تصميم واجهه البروشور اللى جايبهولكم
زى ما انتوا شايفين ده بروشور مركز لغات
طبعا اللوجو اللى فوق ده مسروق من موقع لوجو بى
بس مالناش دعوه بيه خالص لان ده بتاع العميل اصلا
عاوزكم تشوفوا التصميم عامل ازاى
العميل قال انه عاوز التصميم ازرق
وقال انه عاوز صور لناس بتدرس
عملنا احنا ايه بقى
اولا جبنا ارضيه زرقه شيك
ثانيا جبنا اللوجو بتاعهم وحطيناه فى النص فوق بعد ما كبرناه وغير كده كمان واخد حته ابداع من المصمم فى التمويجه اللى وراه علشان اللوجو يظهر اكتر
وعلى فكره لوجو المكان اللى حتعمله بروشور اهم حاجه فى الواجهه ولازم تركز عليه
ثالثا فتحنا النت ودورنا على صور ناس بتدرس
رابعا عملنا توزيعه لذيذه دمجنا فيها بين الصور وبين اللغات اللى المركز بيدى فيها كورسات
خامسا شويه بهارات مننا عملنا كام صوره صغيره تحت مدورين بحيث يعملوا منظر برضه
بس كده خلصنا واجهه البروشور
تصميم كويس وبسيط وتمام اوى
والاهم من ده ان تصميم الواجهه هيا دايما اللى بتحدد بقيه الورق بتاع البروشور حيبقى متصمم ازاى
خلاص عرفنا الواجهه بتتعمل ازاى
نيجى بقى للتطبيق
شركة
Speed Link
النشاط
تصميم مواقع انترنت
تجهيز سيبرات
عقود صيانه شهرية
تصميمات فلاش
اعداد مشاريع التخرج
المطلوب منكم بقى
تعملوا لوجو للشركة دى ومش مهم يكون مسروق او مش مسروق
وتجيبوا صور تتناسب مع النشاط
وظبطوا كل ده فى التصميم كله على بعضه
مستنى تطبيقاتكم علشان نكمل دروس البروشور

والسلام عليكم ورحمه الله وبركاته

أساسيات تصميم اليفط الإعلانية
بسم الله الرحمن الرحيم

نتوكل على الله ونبدا درس النهارده
تنبيه مهم فى السريع على اللى اخدناه قبل كده
اول درس اتكلمنا فيه عن مفهوم الدعايه
تانى درس اتكلمنا عن درجه مهاره الفوتوشوب المطلوبه للمصمم فى الدعايه
ثالت درس اتكلمنا عن تصميم الكروت الشخصيه
رابع درس اتكلمنا عن الكروت الشخصيه برضه
النهارده بقى حنتكلم عن اليفط
ايه هيا اليفط وايه اهميتها
طبعا اليفط دى عباره عن الاعلان الثابت اللى بيعبر عن نوع النشاط اللى بيمارسه صاحب اليافطه
اهميتها طبعا انها بتعمل دعايه لصاحب النشاط فى دائره نشاطه
يعنى انت مثلا نزلت الشارع بالليل بتدور على سوبر ماركت وكل الناس قافله
لكن لمحت من بعيد يافطه منوره مكتوب عليها سوبر ماركت
يبقى حتروح عليها على طول
يبقى كده الراجل صاحب السوبر ماركت استفاد من اليافطه
مثال تانى برضه
يافطه عياده دكتور
انت رايح لعنوان عياده دكتور واول مره تروح ولسه حتدور على مكان العياده
وانت واقف فى الشارع لقيت يافطه مكتوب عليها اسم العياده اللى انت بتدور عليها
يبقى كده اليافطه دى سهلت عليك انك تدور كتير
علشان كده اليفط مهمه جدا لاى صاحب نشاط
ولا غنى عنها
مفيش حد بيفتح محل او مكتب او شركه الا واول حاجه بيفكر يعملها هيا اليافطه
عرفنا خلاص اهميه اليفط
نيجى بقى لانواع اليفط
اليفط تلات انواع
فيلكس وبانر وفنيل
الفيلكس دى عباره عن الخامه الجلد اللى بيتطبع عليها التصميم وبعد كده بتتشد على بوكس خشب وجواه لمبات علشان تعمل يافطه مضيئه
البانر بقى عباره عن الخامه الجلد اللى بيتطبع عليها التصميم برضه بس مش بينفع يتحط وراها لمبات وبتتعلق عادى
الفنيل ودى اليفط اللى مش بتتصمم بالالوان مثالها العادى قائمه الاسعار
احنا اللى يهمنا دلوقتى الفيلكس والبانر
لا وكمان دول مش مهمين
لان لما بيتطلب منك تصميم يافطه انت مش بيبقى ليك دعوه اليافطه دى حتتطبع فيلكس او بانر انت اللى يهمك تصممها وحكايه طباعتها لاى نوع بترجع للمطبعه مش ليك
معنى كده ان التصميم واحد لاى من النوعين دول
نيجى بقى لحته تصميم اليافطه
اولا انت بتشوف المقاس المطلوب كام
يعنى مثلا لو 2 متر فى 1 متر
بتفتح صحفه جديده فى الفوتوشوب مقاس 200 سم فى 100 سم
الجديد بقى
ان الريزليوشن بيبقى 72 بيكسل فى الانش
72 مش 300 زى الكروت
فيه حاجه مهمه لازم انبه ليها برضه
ان فيه ناس كتير بتقول انهم يصمموا اليافطه على مقاس صغير عادى وليكن مقاس الكارت وبعد كده يكبروها على المقاس الكبير
طبعا الكلام ده غلط
اليافطه بتتصمم على مقاسها الاصلى والريزليوشن الاصلى علشان تطلع كويسه فى الطباعه لكن لما تيجى تصممها على مقاس صغير وتكبرها بعد كده ابقى اتفرج عليها حتبقى عامله ازاى فى الطباعه
اوك عرفنا المعلومه المهمه دى
نيجى بقى لنقطه مهمه جدا
ان المصمم اللى اول مره يصمم يافطه
اول حاجه بتواجهه
انه بيقول ازاى اعرف ان اسم اليافطه اللى حاكتبه حيطلع كبير لما اليافطه تتطبع
انا باقول ان اسم اليافطه ده هوه المؤشر اللى عن طريقه حتوزع بقيه البيانات وتظبط حجمهم
اولا تكتب اسم اليافطه وليكن زيرو نت زى ما انتوا شايفين فى اليافطه اللى تحت
تكتبها بمقاس كبير وبعرض اليافطه
فيه لوجو للمكان زى اللى فى اليافطه يبقى تحطه برضه بمقاس كبير لان اللوجو مهم جدا لصاحب المكان
ثانيا: تكتب بيانات اليافطه بمقاس اصغر شويه من اسمها وتوزعهم بشكل حلو حسب ذوقك وتحاول على قد ما تقدر يبقوا واضحين ( تحطهم فى مربعات دواير مثلثات تطلع نور منهم اتصرف)
ثالثا: اهتم اوى بالصور لان الصور دى اول حاجه حيشوفها الناس قبل البيانات وكمان بتدى شكل لليافطه
يعنى يفطه زى اللى قدامكم فيها صور لالعاب زى ما انتوا شايفين
الفكره بقى اللى فى اليافطه دى اللى عاوزكم تاخدوا بالكم منها
انهم مقسومه نشاطين
اول نشاط اللعب والنت
وتانى نشاط الكمبيوتر والتجميع
علشان كده لاحظوا ان تم الفصل بين النشاطين بشكل لذيذ
معملناش خط علشان يفصل بينهم
لا جبنا صوره كمبيوتروكتبنا اسم المكان تانى بس جمبه كلمه كمبيوتر وفى مربع ومع شكل الكمبيوتر الحلو بقت ملفته
وبرضه حطينا صور للوجوهات ماركات كمبيوتر
بس كده
وادى الشكل النهائى

تصميم اليفطه بسيط وسهل ومفيهوش حاجه
طالما انتوا عديتوا من مرحله الكروت الشخصيه حتبقى اليفطه سهله بالنسبه لكم
طبعا اليفط عاوزه شغل اكتر شويه من الكروت بس برضه سهله وبسيطه وبتتعمل على حسب دماغ الزبون
جه زبون عاوز يافطه مليانه وفيها صور اولاده وصورته هوه وصور كتير اوى للنشاط اللى حيعمله
نفذ كلامه وهوه حينبسط اوى من اليافطه حتى لو كان التصميم مش عاجبك
جالك زبون تانى عاوز يافطه شيك وبسيطه وبتعبر بابسط شىء عن نشاط المكان
ابقى مخمخ فيها وخلى اليافطه كلاسيك على قد ما تقدر
عامه اليافطه زى الكروت بتتنفذ على حسب دماغ الزبون
وده اللى عاوز اوصلهولكم بالنسبه لشغل الدعايه
انت بتصمم اى حد على حسب دماغ الزبون مش على حسب دماغك انت
فمش مهم انت مقتنع بيها ولا لأ انا مش بقولك امسك المايك وغنى
افتكر دايما ان التصميم اللى بتعمله ده للزبون مش ليك فلازم يكون على مزاجه هوه حتى ولو انت مش مقتنع بيه
لان اقتناعك مش مهم لاغلب الزباين اهم حاجه هما يقتنعوا وعندهم حق فى النقطه دى لان الزبون هوه صاحب النشاط وهوه اللى حيدفع والتصميم ده ليه هوه يبقى انت مش متحمل حاجه بعد كده
فيه مصممين بيقولوا لأ انا معملش تصميم وحش من وجهه نظرى علشان الزبون عاوز كده
انا باقولهم متبقاش تكتب اسمك على التصميم الوحش وابقى اكتبه على التصميم الجامد
وزى ما قولت قبل كده يا جماعه
مكاتب الدعايه دى مجرد بدايه
بعد كده لما تاخد خبره جامده فى المجال ده حتقدر تشتغل فى مكاتب للتصميمات بس
المكاتب دى اللى مش بتطلع اى تصميمات
ساعتها حتلاقى اللى انت عاوزه وحتلاقى ان المطلوب منك تصميمات نضيفه
ارجو ان المعلومه دى تكون وصلت لكم
نيجى بقى للجزء اللى مش بتحبوه
Home work
مطلوب تصميم يافطه لمحل بيع اجهزه كمبيتور
اسمه المحل
turbo
النشاط: بيع اجهزه كمبيوتر كامله
بيع مكونات كمبيوتر
بيع شاشات مستعمله
شراء مكونات الكمبيوتر المستعمله
المطلوب صور لكومبيوترات ولوجوهات ماركات كومبيوتر والكلام ده واليافطه تكون غامقه شويه
المقاس اللى عاوزكم تصمموا عليه انا مش عاوز مقاس كبير
عرض 9 سم وطول 5 سم زى الكارت وريزليوشن 300 عادى
ارجو يا جماعه ان اللى يدخل يعمل تطبيق ويوريهولى علشان انا بازعل لما مش بالاقى تطبيقات لانى باحس انى باكتب على الفاضى ومفيش حد استفاد
وخلى بالكم انتوا اخر درس ضحكتوا عليا وكنت عاوز تطبيقين مفيش غير اتنين هما اللى عملوا التطبيقات وكل واحد فيهم عمل تطبيق واحد من الاتنين
بس ماشى حنعديها المره دى
مستنى تطبيقكم واسف انى اتاخرت فى الدرس ده بس ان شاء الله الدرس الجاى مش حيتاخر طالما انتوا بتطبقوا

والسلام عليكم ورحمه الله وبركاته


فكرة عامة عن التصميم التجارى
نرجع لموضوعنا على بركه الله
احنا يا جماعه فى الاربع دروس اللى فاتت اخدنا تلت حاجات حافكركم بيها تانى دلوقتى علشان الموضوع ميهربش منكم
اولا : فكره عامه عن الدعايه وانواعها
ثانيا : مهارات الفوتوشوب المطلوبه للدعايه
ثالثا: تصميم كارت شخصى بسرعه وانجاز وجبت كارت وشرحته
النهارده بقى
عاوز كل واحد يسأل نفسه هوه عاوز ايه بالظبط من الفوتوشوب
مجرد انه يتعلمه وخلاص ويروح يشوف اى درس فى الفوتوشوب ويتعلمه ويجيب فى صور واستايلات وفلاتر وفرش ........ الخ
طب وفى الاخر ايه الغرض
ايه لازمه واحد عارف الفوتوشوب كويس جدا ومستواه عالى جدا فيه ورغم كده كل استفادته من البرنامج تنحصر فى انه بيعمل تصميمات لنفسه ولقرايبه ولحبايبه وتوقيعات ...... الخ
النهارده مش حنتكلم عن حاجه بالنسبه للتصميمات
حنتكلم عن حاجه مهمه جدا لازم تعرفوها من دلوقتى قبل ما نكمل الدروس وده علشان انا اكتشفت ان فيه ناس كتيره هنا نفسها تشتغل فى المجال ده فانا عاوزها تبقى عارفه هيا حتبقى ماشيه ازاى
اللى عاوز اوصلهولكم يا جماعه ان اى واحد مصمم فى مكتب دعايه مش مطلوب منه ابداع مش تقعد تعمل نفسك دافنشى وتقعد تجرب الفرش والخلفيات والصور والالوان والخطوط
الحاجات دى تعملها فى حالتين
يا اما انت شغال فى مكتب تصميم بس مش دعايه فى الحاله دى بيبقى المطلوب ان المصمم يكون حسه الفنى عالى علشان مكاتب التصميم كل وظيفتها انها تصمم بس فبياخدوا راحتهم فى الوقت فبالتالى لازم يطلعوا حاجه كويسه
الحاله التانيه انك تكون قاعد فى البيت ومعاك كوبايه الشاى والسيجاره وقاعد اخر مزاج وعاوز تعمل تصميم
بس فيه حاجه عاوز اوضحهالكم من دلوقتى
اوعى حد فيكم يفتكر انى باقوله متبقاش مبدع فى الفوتوشوب او متبقاش مستواك وحسك الفنى عالى
لا
تكون مبدع ومستواك عالى وراجل فاهم البرنامج كويس
لكن ساعه الشغل تنسى اى حاجه ممكن تخليك تاخد وقت فى التصميم
لكن فى الاول والاخر لازم يكون برضه مستواك عالى
عميل مثلا طلب من شركتك انها تطبعله بروشور مثلا
طبعا البروشور مهم للزبون جدا علشان ده واجهه ليه وبالتالى مش بيبقى عايز اى تصميم والسلام
فى الحاله دى بقى حتطلع مواهبك براحتك
وكمان برضه لازم فى خلال شغلك تحاول دايما تطور من نفسك ومن تصميماتك
وحطوا تحت كلمه تطور من نفسك ومن تصميماتك مليون خط
ازاى تطور من نفسك فى البرنامج وتطور تصميماتك فى الدعايه
تدخل مثلا على النت تشوف صور حلوه ممكن تنفعك فى شغلك وطبعا انت حتكون ساعتها عدى عليك شغل كتير وتقدر تحدد ايه الصور اللى حتنفعك وايه اللى مش حتنفعك وبالتالى تصميماتك حتتطور
تشوف برضه تصميمات لمكاتب تانيه وتحاول تلاحظ هما عاملين ايه جديد فيها وتطبقه انت مع نفسك
تتابع كل جديد فى مجال الدعايه وفى مجال التصميم
تمشى فى الشارع تبص على اليفط ولما تدخل مطعم تبص على تصميم المنيو ويوم ما حد يديك فلاير بعد صلاه الجمعه تبص تصميمه عامل ازاى
من الاخر تتابع شغل السوق عامل ازاى وتحاول دايما انك تسبقه
كده حتلاقى نفسك مع الوقت بتتطور جدا وحتلاقى نفسك وصلت لمرحله انك تعمل تصميم جامد جدا وفى خلال وقت صغير جدا برضه
ساعتها بقى تقدر تروح تشتغل فى مكتب للتصميمات بس ودول فلوسهم كويسه
او تروح تقدم فى وكاله اعلانيه كبيره
احنا دلوقتى فى مرحله تكوين مصمم الدعايه
تصبر على نفسك ومتستعجلش وكل حاجه حتعرفها وحتفهم الشغل كويس بس ده بالوقت وبالخبره ومفيش وكاله كبيره حتشغلك الا لو كنت راجل خبره ولو مش مصدقين بصوا فى الشروط اللى بتحطها وكالات الاعلان الكبيره حتلاقى اهم شرط الخبره وده طبعا فى اى شغله عامه
انا دلوقتى باحطكم على اول الطريق
الطريق اللى لو انتوا مسكتوا فيه وشويه تعب كمان وشويه صبر
حتوصلوا لمرحله الشغل العالى
علشان كده محدش فيكم يحط فى دماغه ان الموضوع ده انا عامله علشان تشتغل فى مكتب دعايه وخلاص
لا الموضوع ده علشان تعرف تشتغل فى مكتب الدعايه وعن طريقه تاخد الخبره المطلوبه اللى حتوصلك لمستويات عاليه جدا فى الدعايه
بالتالى
حنحدد من دلوقتى الغرض من الدوره دى ايه علشان كله يبقى عارف احنا ماشيين ازاى
1 – تعرفوا مفهوم الدعايه
2 – تعرفوا ايه المهارات الاوليه المطلوبه منك فى الدعايه
3 – تعرفوا قيمه الوقت فى الدعايه
4 – تعرفوا ازاى تشتغلوا فى مكتب دعايه
5 – تعرفوا ازاى تطوروا من نفسكم فى الدعايه
6 – تعرفوا ايه هيا الطباعه وتصميمك بيحصله ايه فى الطباعه
7 – اخيرا تعرفوا ازاى تعدوا من مرحله المكاتب العاديه
علشان كده انا باقول من دلوقتى ان اهم حاجه الطموح فى الشغلانه دى
بس برضه لازم الصبر
مش تكون طموح ومستعجل وعاوز تتقدم بسرعه
الصبر حلو وبيعلم احسن والحاجه اللى الواحد بيعرفها عملى وبياخد فيها وقت عمره ما بينساها
يا ريت تكون فكره الدوره وازاى هيا ماشيه وصلت لكم علشان ده يهمنى جدا علشان الموضوع ميهربش من ايدنا
وفى الاخر انا باقول ان الموضوع ده مجهود شخصى ليا والموضوع ده هوه الموضوع الوحيد فى المجال ده على الانترنت ومفيش موضوع مماثل حتى ليه علشان كده انا مش باسمح لاى حد انه ينقله لاى منتدى تانى وحق نقله محفوظ ليا انا بس
واشوفكم فى الدرس اللى جاى قريب ان شاء الله
والسلام عليكم ورحمه الله وبركاته

خطوات تصميم كارت شخصى ( الجزء الثانى) 2
بسم الله الرحمن الرحيم
نبدأ على بركه الله درس النهارده
النهارده بقى يا جماعه اعذرونى انا حاتكلم عن الكروت الشخصيه تانى وده راجع لان الكروت الشخصيه دى اهم واكتر حاجه بيشغل فيها المصمم فى مكتب الدعايه لان مكاتب الدعايه العاديه نشاطها الاساسى قائم على الكروت الشخصيه
بس النهارده حنتكلم عن الكروت الشخصيه من جهه تانيه غير جهه التصميم
حنتكلم من جهه التصميم لما بيتطلب منك
دلوقتى انت راجل شغال فى مكتب خلاص
جالك المندوب ومعاه بيانات الكارت
قالك البيانات اهى
عاوز التصميم دلوقتى علشان الحق ادى البروفه للعميل
حتعمل ايه
تقوم فاتح صفحه التصميم زى ما قولنا على المقاس بتاع الكارت العادى
وتبدا تشتغل
طب ايه اللى حتعمله بالظبط علشان تخلص التصميم فى اسرع وقت
اولا : تجيب خلفيه للكارت ( وخلى بالكم الخلفيه دى بالذات المندوب الشاطر بيقرا دماغ العميل وبيقولك اذا كان العميل عاوز الكارت هادى ولا غامق ولا مليان )
ف لو العميل عاوز الكارت هادى بتختار خلفيه هاديه ولو عاوزه غامق بتختار غامقه وهكذا
ثانيا: تكتب بيانات الكارت وبعد ما تخلص كتابه البيانات تنسق البيانات من حيث
الحجم والشكل والتوزيع
الحجم : هوه انك تراعى ان فيه كلام حيبقى حجمه كبير بالعاده وكلام اصغر منه
( اسم الكارت مثلا بيبقى اكبر من العنوان واسم المدير اكبر من رقم الموبايل وكده)
الشكل : وده يعنى الخط اللى حتستخدمه فى الكتابه
طبعا الخط اللى حتستخدموه هوه الخط العادى خالص بس اسم الكارت طبعا ممكن تكتبه بفونت تانى مميز شويه وبرضه اسم المدير ممكن يتكتب بفونت مميز بس يكون زى الفونت اللى اتكتب بيه اسم الشركه وبقيه البيانات بالفونت العادى خالص
معنى كده ان الكارت الواحد المكتوب بالعربى الاحسن والاسرع انك متستخدمش فيه غير خطين
الخط العادى وخط تانى مميز ( اندلسى- فارسى ...... الخ )
التوزيع : وده برضه مهم جدا
التوزيع ده عباره عن ايه
التوزيع عباره عن انك تنسق بيانات الكارت فى مساحه الكارت نفسه
بحيث فى الاخر تلاقى بيانات الكارت مترتبه كويس ومتوزعه تمام فى الكارت
يعنى اسم الكارت مثلا يبقى فوق خالص فى النص زى الكارت اللى جبتهولكم قبل كده
وممكن برضه يتحط فوق على اليمين
وتحت اسم الكارت يتحط اسم النشاط ( زى ما موجود فى الكارت اللى جبته قبل كده)
وفى النص يتكتب اسم المدير وتحته على طول رقم موبايله
واخيرا تحت خالص فى النص يتكتب العنوان وارقام التليفونات
يبقى كده خلاص احنا اتكلمنا عن
أولا/ خلفيه الكارت ثانيا/ كتابه بيانات الكارت
ثالثا بقى/ الوان الكتابه
ودى بتكون على حسب لون الخلفيه
يعنى لو الخلفيه زرقاء يبقى اللون الاحمر حيبان عليها
بترجع فى الاخر للمصمم
بس على قد ما تقدر ما تحطش الوان كتير
يعنى مثلا اسم الشركه بلون ظاهر عن لون الخلفيه
وكمان اسم المدير نفس النظام ويفضل ان اسم المدير يبقى بنفس اللون بتاع اسم الشركه
لون العنوان دايما بيبقى اسود وواخد تحديد ابيض او يبقى اللون ابيض وواخد تحديد اسود
وخلى بالكم التحديد strock
مهم جدا
يعنى كل البيانات تديها تحديد ابيض علشان تظهر اكتر وكمان شادو اسود
والكلام ده كله حتلاقوه فى
Blending Options
رابعا : فاض الصور بتاعه الكارت
ودى طبعا على حسب النشاط بتاع صاحب الكارت
يعنى كارت السنترال يبقى فيه صور موبايلات ولوجوهات فودافون وموبينيل والكلام ده
وكارت السيارات يبقى فيه صور سيارات طبعا وصور لوجوهات شركات السيارت
وكارت السوبر ماركت يبقى فيه صور مواد غذائيه وهكذا فى اى كارت
ودايما فى الصور اللى بتحطها فى الكارت لازم تكون مقصوصه كويس
وطبعا توزعها فى الكارت بشكل كويس
ويفضل تديها outer glow
علشان تبان اكتر
خلاص كده الكارت خلص
طبعا زى ما قولت قبل كده اكتر حاجه بتخلى مصمم الدعايه المبتدىء ياخد وقت فى تصميم الكارت هي الخلفيه والكتابه
بعد الكلام اللى قولناه ده متهيالى مفيش صعوبه
ومع التمرين ومع كتر الشغل ومع الخبره حتعمل الكارت وانت مغمض
وحيجيلك المندوب تقوله استنى عشر دقايق والتصميم حيبقى جاهز
اتعرضنا النهارده خلاص للكروت الشخصيه مره تانيه واعذرونى على تكرار الكروت بس صدقونى هيا دى اكتر حاجه حتواجهكم لو اشتغلتوا فى مكتب دعايه علشان كده عاوز اتأكد انكم شربتوها
دلوقتى بقى نيجى للجزء العملى بتاعنا
واللى بيحدد لكل واحد فيكم هوه استفاد من الدرس ولا لأ
دلوقتى انا حاعتبر نفسى مندوب وانتوا المصممين
وحاديكم بيانات كروت وانتوا تصمموها
وكل واحد يصمم الكارت يجيبه هنا ويوريهولى ويقول هوه قعد فيه قد ايه
وانا احددله العيوب اللى فى الكارت
على فكره الكلام ده مهم جدا علشان لو واحد فيكم راح يقدم فى مكتب
حيقعدوه على الكمبيوتر ويقولوله قدامك الصور اللى عندنا والفونتات وكل حاجه
اعملنا كارت سنترال مثلا
ف انت لو متدرب كويس حتعمل الكارت بسرعه وكفاءه
حيقوم صاحب المكتب مشغلك على طول
------------------
البيانات
اولا / تصميم كارت لشركه قطع غيار سيارات
اسم الشركه: اليكس كار
نوع النشاط: قطع غيار السيارات
اسم المدير/ محمد سعيد
رقم موبايل المدير / 0105558884
العنوان/ 88 شارع ملك حفنى – سيدى بشر – الاسكندريه
رقم تليفون الشركه / 5412874
الراجل ده عاوز الكارت هادى
وعاوز صوره عربيه اوبل
وعاوز لوجو فولكس فاجن واوبل وسكودا ورينو
خلاص اهو معاكم بيانات الكارت اعملوه
-------------
ثانيا / تصميم كارت سنترال
اسم السنترال / موبى فون
نوع النشاط / مكالمات محليه ودوليه وكروت شحن واكسسوارات موبايلات وتحويل مكالمات للمنازل
اسم المدير/ احمد على
موبايل المدير/ 0107854985
العنوان / 56 شارع الجبرتى – باب شرق – الاسكندريه
رقم تليفون السنترال/ 4857459
الراجل عاوز الكارت غامق
وعاوز لوجو فودافون وموبينيل وكام صوره لموبايلات حديثه

خلصنا خلاص درس النهارده ومستنى تطبيقهم واللى ميعرفش الفوتوشوب مش مطلوب منه غير الادوات اللى فى الصوره والكلام ده برضه للى بيعرف الفوتوشوب
واعدادات المقاس
9 عرض و 5 طول وريزليوشن 300

مستنى تطبيقكم ويا ريت تشرفونى
والسلام عليكم ورحمه الله وبركاته

خطوات تصميم كارت شخصى ( الجزء الاول ) 1
بسم الله الرحمن الرحيم

النهارده يا جماعه انا جايب صوره لكارت شخصى وحاشرح فكره سرعة تصميمه
نبدأ على بركه الله
فى درس النهارده يا جماعه حتكتشفوا ان تصميم الكروت الشخصيه سهل جدا ومفيهوش اى صعوبه
اول كارت انا جايبه ده كارت لشركه قطع غيار سيارت
لو بصينا فى الكارت بتأنى حنلاقى عناصره تتكون اول
1- اسم الشركه او اسم الكارت ( شركه الرشيدى )
2- نوع النشاط
( قطع غيار سيارات)
3
- اسم مدير الشركه ( اسلام الرشيدى)
4
- عنوان الشركه
5- تليفونات الشركه
6 - خلفيه عاديه
7 - صور لوجوهات ماركات قطع غيار سيارات ( فولكس وسيات وسكودا واودى)
8- صوره عربيه سكودا
بس كده

دلوقتى تخيل نفسك روحت قدمت فى شركه دعايه واشتغلت خلاص وجالك مندوب ومعاه بيانات الكارت ده وعاوز بروفه لتصميم للكارت
حتعمل ايه
اولا فيه مبادىء عامه المصمم بيمشى عليها
1- ان توزيع البيانات مهم اوى فى الكارت ( زى ما احنا شايفين ان شركه الرشيدى مكتوبه بحجم كبير فى نص الكارت وتحتيها اسم النشاط بحجم اصغر
شويه وتحتيهم اسم المدير وتحت خالص العنوان ثم التليفونات)
التوزيعه دى فيه غيرها توزيعه تانيه مش بعيده عنها وحنشوفها برضه والتوزيعتين دول مش بيخرج عنهم اى تصميم
يبقى انت دلوقتى كده خلاص عارف التوزيعه وحتعملها وانت مغمض ومش حتتلخبط وتاخد وقت
2
- الالوان
ودى مهمه جدا وطبعا كل مصمم لازم يبقى عنده حس فى التصميم وميعملش الوان مش جايه على بعضها بس فى نفس الوقت ميفتحش خصائص الليرز
ويقعد يجرب الالوان كلها
علشان كده فيه قاعده اساسيه بالنسبه لالوان العنوان والتليفونات
كل العناوين والتليفونات اللى تكتبهم فى الكارت تكتبهم باللون الاسود وحواليه تحديد ابيض )Strocke)
او العكس اللون ابيض وحوا
ليه تحديد اسود ( زى الكارت اللى قدامنا)
والاسود او الابيض بيجوا مع اى لون فى الخلفيه
3 - تالت حاجه نراعى الوان الصور اللى بتتحط فى التصميم
بس طبعا لو الصور اللى فى تصميم صور لوجوهات لماركات مش حنيجى جمب الوانها طبعا
لكن لو صوره عاديه ( زى صوره العربيه اللى فى الكارت ) احنا شايفين ان العربيه لونها احمر
هل كان ينفع ان العربيه يبقى لونها اخضر مثلا
هل كان ينفع ان لونها يبقى ازرق
كان حيحصل كوكتيل فى الوان الكارت طبعا
طب دلوقتى لو انت بتصمم الكارت ده ودورت
فى صور العربيات اللى عندك ملقتش غير عربيه سكودا خضراء حتعمل ايه
ببساطه تغير لونها علشان يمشى مع التصميم او تدخل على جوجل وتكتب اسكودا وتشوف الوان العربيات اللى حتجيلك ايه
العمليه بسيطه ومفيهاش حاجه
تخيل نفسك دلوقتى بتعرف فوتوشوب كويس واشتغلت فى شركه واتطلب منك تصمم الكارت ده عارف ايه اللى حيحصل
اولا : حتقعد ساعه تكتب بيانات الكارت علشان انت حتكتب البيانات وبعد كده حتقلب فى الخطوط اللى فى البرنامج علشان كل جمله فى الكارت تكتبها بخط معين
وبعد ما تخلص من البيانات حتوزعهم توزيع غريب ومش حيبقى فيه تناسق بين انهى كلمه تبقى كبيره وانهى كلمه تبقى صغيره
ثانيا : حتقعد ساعه برضه تقلب ف
ى الخلفيات اللى عندك فى الكمبيوتر علشان تختار واحده تصمم عليها
ثالثا: حتقد ساعه تالته تدور على صور الوانها تعجبك
بعد التلت ساعات دول بص بقى للتصميم
حتلاقى التوزيعه اولا وحشه
كتره الخطوط فى الكارت مش عامله تناسق
حتلاقى مفيش تناسق بين الكلام اللى المفروض يبقى كبير والكلام اللى المفروض يبقى صغير
حتلاقى انك مدى البيانات استروكات الوانها غريبه ( اصفر واحمر واخضر وكده)
وفى الاخر المندوب حياخد منك البروفه ولما يشوفها العميل حيطلب تغيير التصميم كله
الكلام ده يا جماعه بيحصل فعلا وانا مش بخترع
وحصل قدام عينى وحصلى انا كمان لما كنت لسه فى بدايه حياتى العمليه فى التصميم التجارى
نرجع بقى للكارت بتاعنا ونشرح تصميمه وازاى تعمله بسرعه
اولا حتفتح صفحه فى الفوتوشوب عادى جدا بمقاس الكارت ( عامه بيبقى مقاس الكروت 8.5 فى 5.4 )
ثانيا : الخلفيه ودى مهمه جدا
حل الخلفيه بقى انك تكون عارف مكان كروت العربيات اللى اتعملت قبل كده وعارف اشكال كويسه منهم بحيث انك تجيب تصميم مطبوع قبل كده وتاخد خلفيته
وتشتغل عليها
الحل التانى وده الاسهل والبسيط
(gradient) انك تعمل زى ما معمول فى ا
لكارت ده الخلفيه عباره عن جاريديانت
اورانج فى رصاصى
وعندك كميه جاريدينت فى الفوتوشوب جميله اوى
يعنى مثلا لو المندوب قالك ان صاحب الكارت عاوز الكارت هادى او بيحب الالوان الفاتحه اعمل جاريدينت ازرق فى ابيض مثلا وحتلاقيها جميله جدا
ولو المندوب قالك ان صاحب الكارت بيحب ال
الوان الغامقه اعمل زى الكارت ده واديها اورانج فى رصاصى بحيث الرصاصى يدى الغمقان اللى الزبون عاوزه
وفى نفس الوقت الاورانج يفتح الكارت شويه علشان الكارت ميبقاش كئيب
ثالثا: البيانات
وهنا لازم نتكلم عن الخطوط
بصوا يا جماعه اى مصمم تجارى لازم يعود نفسه انه يشتغل بخطوط معينه ميغيرهاش
يعنى بالنسبه للخطوط العربيه المصمم يشتغل بالخط العادى اللى زى فى الكارت ده وعنده الفارسى والاندلسى جميل برضه وفونت قناه العربيه
دول كفايه
اما بالنسبه للخطوط الانجليزى ف دول كتير اوى وبتلاق
ى الجامدين كتير فيها علشان كده المصمم يحاول برضه يحفظ اسم كان فونت انجليزى جامد وميشتغلش غير بيهم ويبقى يجرب الخطوط التانيه لو هوه قاعد رايق
كده خلصنا من الخطوط
كتبنا البيانات
نوزعها
نراجع بقى نشوف احنا عملنا ايه لغايه دلوقتى
1 - فتحنا صفحه تصميم جديد
2 - عملنا خلفيه فى الانجاز
3 - ك
تبنا البيانات ووزعناها
بعد كده بقى نشوف الكارت محتاج ايه تانى
زى الكارت بتاعنا مثلا كان مطلوب فيه اللوجوهات اللى انتوا شايفنها نجيبها ونوزعها بضمير برضه
وصوره عربيه حلوه نجيبها ونقصها ونحطها فى الكارت
وبعد كده نظبط الوان البيانات اللى فى الكارت
وعلى فكره فى اغلب الصور او اللوجوهات اللى بتتحط فى الكروت بتاخد اوتر فى الفوتوشوب علشان بيخليها تنور زى ما انتوا شايفين
كده خلاص الكارت جاهز
المندوب بياخد منك البروفه والزبون بيتكيف اوى من الت
صميم ولو عاوز تعديل بيقولك مثلا تكبر اسم الشركه شويه او اسمه هوه شويه او توضح العنوان اكتر كده يعنى حاجات رفيعه
كده يا جماعه
وكمان دى صوره لضهر الكارت( الكروت نوعين نوع وش واحد ونوع تانى وش وضهر)
ولو تلاحظوا حتلاقوا ان الخلفيه بتاعه الضهر نفس خلفيه وش الكارت
وكمان تصميمها بسيط
اخدنا اللوجوهات حطناهم بشكل ظريف واخدنا اسم الشركه كبرناه على الاخر
عملنا تحديد حلو واديناه جاريديانت الخلفيه وخلاص ( pen tool)وبأداه
واوقات كتيره برضه صاحب الكارت بيطلب ان وش الكارت يبقى بالعربى زى الكارت ده والضهر بالانجليزى
كل ما عليك فى الحاله دى انك تعمل نفس الخلفيه طبعا ونفس اللوجوهات ونفس الصور اللى فى الوش تبقى اى الضهر وتترجم البيانات العربى لانجليزى وخلاص
لو انتوا طبقتوا الكلام ده يا جماعه على تصميم الكارت ده
الكارت مش حياخد اكتر من ربع ساعه
وكمان فيه نقطه مهمه
ان المصمم لما يشتغل لازم يبقى ليه ادواته المعينه اللى بيشغل بيها وبينجز بيها شغله والاداوت دى هيا
1- تصميمات سابقه عملها هوه او غيره عملها ودى يصنفها ( يعنى تصميمات السنترالات تتحط فى فولدر لوحدها وتصمميات السيارات فى فولدر لوحدها وهكذا )
والتصميمات ده بتفيده فى انه لما بيتطلب منه تصميم كارت معين بيبص فى التنصيف بتاع الكارت المطلوب منه ويختار كارت حلو كان عمله قبل كده ويصمم عليه وده بينجز جامد وخصوصا فى حاله تكدس الشغل
2- مجموعه خطوط معينه بيشتغل بيها سواء خطوط عربى او انجليزى وطبعا مفيش مانع من التجديد فى الخطوط دى كل فتره بس اهم حاجه يكون حافظهم وملم بيهم
3 - يكون فاتح الانترنت دايما على صفحه جوجل علشان فى اى وقت ممكن يتطلب منه تصميم معندهوش صور كفايه ليه على الكمبيوتر ف يدور على جوجل وده بينجز اوى
بس يا جماعه دى ادوات المصمم اللى بيقدر بيها انه ينجز فى اى شغل يجيله
طبعا دلوقتى لو واحد فيكم قرأ الموضوع ده وهوه ميعرفش حاجه عن الفوتوشوب حيفتكر الحكايه صعبه
لكن انا باقول ان العمليه سهله اوى
انا باقول لكل واحد ميعرفش فوتوشوب خالص انه يتعلم الادوات اللى كنت قايل عليها
وكفايه كده اوى فى الاول
وهوه مع الوقت حيبقى كويس
وخلى بالكم يا جماعه ان المصمم التجارى مع الوقت بياخد خبره رهيبه فى شغله وبيبقى فى الاخر بيعمل التصميمات وهوه مغمض بس اهم حاجه ان المصمم يحاول دايما يطور من نفسه علشان يوصل لمراحل اعلى فى شغل الدعايه يمكن ربنا يكرمه بعد كده ويشتغل فى بوسترات الافلام
والسلام عليكم ورحمه الله وبركاته

بسم الله الرحمن الرحيم

اتكلمنا يا جماعه فى الدرس اللى فات عن فكره الدعايه والاعلان وانواع الدعايه ومجال عمل مكاتب الدعايه
النهارده بقى حنتكلم عن مهارات الفوتوشوب المطلوبه من المتقدم للعمل فى مكتب دعايه
بس الدرس ده مش تعليمى للفوتوشوب لان المنتدى فيه مواضيع كتيره اوى عن تعليم وشرح الفوتوشوب وكلها مواضيع ممتازه
انا حتكلم بس عن درجه استخدام الفوتوشوب المطلوبه للشغل بتاعنا
بصوا يا جماعه زى ما قولت قبل كده
اى مكتب دعايه مش بيهمه خالص ان المصمم اللى جاى يشتغل يكون راجل مبدع فى الفوتوشوب
اهم حاجه يكون بيعمل المعادله دى
تصميم كويس فى وقت قليل
دى المعادله المهمه اوى لاى مكتب دعايه
واحد دلوقتى يجى يسال يقول طب ليه مكتب الدعايه مش بيهمه ان المصمم يكون مبدع فى الفوتوشوب
الاجابه علشان المصمم لو قعد فى كل تصميم يتطلب منه يبدع فيه معنى كده انه حياخد وقت اكتر وفيه احتمال بعد كده انه ميعجبش العميل اللى طلب التصميم من الشركه ( وده احتمال وارد فى اى تصميم ) وبالتالى ساعتها حيتعمل فيه تعديلات كمان ووقت تانى
لكن لو التصميم كويس وعادى ومعمول بسرعه وجه بعد كده العميل عاوز يعدل فيه حيبقى سهل فيه التعديل ومش حياخد وقت
والاهم من كده ان اغلب الفلاتر اللى فى الفوتوشوب لما بتطبع بعد كده مش بتبقى كويسه فى الطباعه
كمان بيعدى على مكاتب الدعايه اوقات كتيره بيبقى الشغل فيها كتير والتصميمات المطلوبه كتير اوى ولازم تخلص بسرعه لان العميل بتاع الدعايه
بيبقى عاوز حاجته جاهزه ومطبوعه فى اسرع وقت وفى نفس الوقت كويسه
علشان الاسباب دى كلها شركات الدعايه بتفضل المصمم السريع اللى تصميماته كويسه عن المصمم البطىء اللى تصميماته جامده وكلها ابداع
بالتالى انا بانصح اى واحد هنا عاوز يروح يقدم فى شركه دعايه انه يتعامل مع الفوتوشوب بطريقه السهل الممتنع
بمعنى انك تشوف التصميم المطلوب منك عاوز ايه بالظبط وتعمله
مثلا لما يتطلب منك تصميم كارت شخصى طبعا بيدوك البيانات والعميل عاوز الكارت لونه ايه او الخلفيه شكلها ايه والصور اللى فى كارت ايه والكلام ده
انت تاخد البيانات وتكتبها فى التصميم وتنسقها وتحط الخلفيه اللى عاوزها العميل والصور اللى طالبها وتنسق ده كله فى التصميم حتلاقى الكارت مقعدش معاك
اكتر من ربع ساعه
يعنى مثلا اتطلب منك تصمم كارت لسنترال
طبعا بيدوك بيانات الكارت ( اسم السنترال - اسم صاحب السنترال - رقم موبايل صاحب السنترال - ارقام السنترال - عنوان السنترال )
وكمان فى اوقات كتيره بيدوك الخلفيه بتاعه التصميم اللى عاوزها صاحب السنترال ( المندوب اللى بيروحله هوه اللى بيديك الكلام ده كله )
انت وظيفتك بعد ده كله انك تفتح الفوتوشوب وتفتح صفحه جديده على مقاس الكارت وده فى اغلب الشركات بيبقى اكشن فى الفوتوشوب
المهم
انت اول حاجه بتجيب الخلفيه اللى اختارها صاحب الكارت ( ودى بتكون فى تصنيف بتعمله شركات الدعايه للكروت اللى طبعتها قبل كده)
وبعد ما تحط الخلفيه بتكتب البيانات وتوزعها فى شكل كويس فى التصميم ( ومع الوقت مش حتتعامل غير مع توزيعتين او تلاته )
وبعد كده تحط كام صوره موبايل وكام لوجو لشركات الاتصالات
بس كده خلاص الكارت خلص والتصميم بيبقى كويس وبيعجب العميل
نفس الكلام ده تطبقه على مواد الدعايه التانيه
زى الفلايرز او البورشور
دى برضه بيدوك بياناتها والعميل طالب ايه
وانت بتعمل الكلام ده كله والعميل بيعجبه الشغل وبيتطبع وكله بيبقى تمام
ونفس الشىء بالنسبه لتصميم الدفاتر التجاريه
بيبقى عندك تصميمات دفاتر قديمه بتطلعها من على الكمبيوتر وتعدل بياناتها على التصميم المطلوب منك وبتخلص فى اسرع وقت
وعلى فكره درجه مهاره الفوتوشوب المطلوبه لانجاز المهام دى كلها درجه بسيطه وعاديه مش مطلوب منك تبقى راجل محترف فوتوشوب اوى
علشان كده فيه فرق بين اللى بيتعلم فوتوشوب تجاريا وبين اللى بيتعمله اكاديميا
اللى بيكون اتعلم فوتوشوب اكاديميا بيكون فى الاول بطىء فى التصميم وبيبقى محتار يعمل ايه فى التصميم لانه متعلم الفوتوشوب علشان ده ينفعه هوه لنفسه
لكن اللى متعلم الفوتوشوب تجاريا ده بيبقى سريع جدا فى انجاز التصميمات المطلوبه منه لانه بيبقى عارف دماغ الزبون كويس وعارف ايه اللى بيعجب الزباين وايه اللى مش بيعجبهم
طب يعنى ايه مستخدم تجارى للفوتوشوب ؟ وازاى اوصل للمرحله دى وانا لسه فى الاول او اتعلمت الفوتوشوب اكاديمى؟
اولا المستخدم التجارى للفوتوشوب هوه زى ما قولت ده اللى بيبقى سريع جدا فى انجاز تصميمات العملاء وبرغم سرعته الا ان تصميماته بتعجب الزبون بغض النظر عن جمال التصميم لكن بتعجب الزبون علشان المصمم عارف دماغ الزبون كويس
طب ازاى المصمم يعرف دماغ الزبون
ده بيجى مع الخبره العمليه فى مجال الدعايه ومينفعش تتعلمه نظرى
اهم حاجه فى الاول ان المصمم يبقى سريع
ثانيا : الوصول لمرحله الاستخدام التجارى سهله ومش صعبه لان زى ما قولت مش مطلوب منك تبقى محترف البرنامج او مبدع فيه وكفايه يبقى عندك فكره كويسه عن البرنامج ومع التمرين على الشغل التجارى حتبقى تمام اوى
ثالثا : بالنسبه للى بيكون متعلم فوتوشوب وعنده فكره كويسه اوى عنه بس اتعلمه اكاديمى ده برضه سهل انه يتعلم ازاى يستخدم الفوتوشوب تجاريا وده بيكون عن طريق انه لما يجى يصمم شغل تجارى ينسى الحاجات اللى كان بيعملها قبل كده مع نفسه ويعمل اللى مطلوب منه بالظبط من غير زياده ومن غير ما يلف ويدور حوالين نفسه ولما يجى يعمل تصميمات لنفسه يبقى يعمل فيها اللى هوه عاوزه
خلاص يا جماعه عرفنا الفرق بين الاستخدام التجارى والاستخدام العادى ( الاكاديمى)
نيجى بقى لنقطه ايه الحاجات المطلوب تعلمها فى الفوتوشوب علشان تبقى مستخدم تجارى
اهم اداوت الفوتوشوب المطلوبه ودى اهم اداه مطلوبه فى الاستخدام التجارى على الاطلاق هى
pen tool
وده اداه قص ومهمه جدا فى شغل الدعايه وعلى فكره لما بيتعملك تيست فى الفوتوشوب لما تيجى تشتغل فى اغلب الحالات حيتطلب منك تقص بالاداه دى الاول
وانا بكرر يا جماعه الاداه دى مهمه اوى فى شغل الدعايه وفيه ناس كتير اوى بتبقى عارفه الفوتوشوب بس مش بتستخدم الاداه دى خالص
وانا عن تجربه ليا انا ساعات بيجيلى المكتب مصممين طالبين شغل ولما باعملهم تيست اول حاجه باطلبها منهم انهم يقصوا بالاداه دى واغلب اللى بيجوا بيبقوا مش عارفينها اساسا رغم ان بيبقى فيه ناس كتيره منهم فى فنون جميله والفوتوشوب ده من ضمن دراستهم
عرفنا خلاص يا جماعه ايه اهم اداه
بقيت الاداوت المهمه برضه
marquee tool
move tool
magic tool
stamp tool
gradient tool
type tool
+
تكون بتعرف تتعامل مع ال
layers
blending options
بس كده من ضمن اداوت الفوتوشوب كلها دى اهم الادوات واغلب الاداوت اللى حتسخدمها فى 95% من التصمميات اللى حتجيلك
وطبعا يا جماعه المنتدى هنا مليان شروحات للادوات دى كلها واى حد هنا لو معندهوش فكره عن الفوتوشوب خالص يقدر يبص على الشرح بتاعهم فى المنتدى والشروحات بتاعتهم كلها بسيطه وسهله ومفيهاش اى حاجه اهم حاجه بس طبعا التمرين
وفى اخر الجزئيه بتاعه النهارده احب اقول لكل اللى عارفين الفوتوشوب كويس وقرأو الموضوع وعاوزين يشتغلوا فى الدعايه انهم يركزوا على ناحيه السرعه فى التصميم وانا برضه حاجيب ان شاء الله كام صوره لكروت شخصيه وفلايرات وبنرات وحاشرح فكره سرعه تصميمهم فى الدرس الجاى ان شاء الله
والسلام عليكم ورحمه الله

تمهيد بسيط جدا لفكره الدعايه
بسم الله الرحمن الرحيم

نبتدى موضوعنا على بركه الله
أولا يا جماعه علشان تكون مصمم جرافيك ناجح فى شركه دعايه واعلان لازم يكون عندك فكره عن الدعايه والاعلان قبل ما تتقدم لاى شركه لان ده اول سؤال بيتوجه ليك من مدير الشركه لما بتروح تتقدم وكمان مش معقوله ان شركه دعايه تشغلك مصمم اعلانى عندها وانت متعرفش يعنى ايه دعايه ويعنى ايه اعلان
علشان كده اول جزئيه حنبدأ بيها هيا التعريف بالدعايه والاعلان لان الجزئيه دى مهمه جدا لاى مصمم اعلانى والجزئيه دى لو استوعبتها كويس وفهمتها جامد حتأثر عليك بعد كده فى شغلك وحتفرق معاك جامد بجد وانتوا حتحسوا بكده لما ندخل فى باقى الجزئيات التانيه ان شاء الله
ايه هيا الدعايه والاعلان ؟؟؟؟؟
ناخد المعنى العام للعباره وهوه ( الاعلان )
الاعلان ده يا جماعه زى ما موسوعه ويكيبيديا بتقول هو احد الأنشطه الاعلاميه التى لا غنى عنها للأنشطه الاقتصاديه من صناعه وتجاره وخدمات وغيرها من الانشطه الاقتصاديه وكذلك بالنسبه للمؤسسات والجمعيات الخيريه الغير ربحيه والتى بدون الإعلان عن مجهوداتها فلن تحصل على الدعم المجتمعى والتمويل المادى اللازم لاستمرارها فى عمها وادائها لرسالتها
نفسر بقى العباره بتأنى
اول جزء بيتعرض لاهميه الاعلان للانشطه الاقتصاديه وان اى نشاط اقتصادى سواء كان صناعه ( مصنع سيراميك مثلا) او تجاره (شركه توزيع مواد غذائيه ) او خدمات ( شركات الاتصالات )
اى نشاط من دول بيحتاج الدعايه جدا جدا جدا بغض النظر عن جوده المنتج او الخدمه اللى بيأديها
تخيل مثلا مصنع سيرميك ( كمثال ) فتح باستثمارات كبيره وبعد ما انتج معملش اعلانات فى التليفزيون او الجرايد عن انتاجه هل تتخيلوا انه ممكن يبيع بلاطه واحده
نبص برضه لشركات الاتصالات بصفتها اكبر ناس بتعمل دعايه دلوقتى لنفسها
ليه شركات الاتصالات عندنا فى مصر بتصرف ملايين على الدعايه
ليه كل ما تدخل شارع وتبص على السنترالات اللى فيه تلاقى اليفط بتاعته عاملاها شركه من شركات الاتصالات ؟
ليه شركات الاتصالات محاصرانا بكميه اعلانات مهوله فى التليفزيون والجرايد وفى الشارع وفى المناسبات
الاجابه يا جماعه علشان كل شركه عاوزه عدد المشتركين اللى عندها يزيد وكمان استهلاك المشتركين بتوعها يزيد
نيجى برضه لجزئيه الجمعيات الخيريه وهى ان الجمعيات الخيريه من غير ان اعلان عن نفسها مش حتاخد اى دعم نهائى
تخيل كده مستشفى الاطفال اللى لسه فاتحينها لو مكانوش عملوا ليها دعايه هل كانت حتتفتح اساسا
الاجابه طبعا لأ
معلش يا جماعه انا باطول عليكوا شويه فى الاول بس علشان ادخل فكره الدعايه فى دماغكم صح لان فيه ناس كتيره اوى فاهماها غلط
نفك دماغنا بقى دلوقتى من الامثله الكبيره بتاعه الشركات والمصانع وشركات الاتصالات ونروح للأمثله الصغيره اللى موجوده فى شوارعنا
الجزار مثلا اللى فى منطقتك
هل انت متخيل ان الجزار ده بيعمل دعايه
طبعا بيعمل دعايه بس هل الدعايه اللى بيعملها بتكون اعلان فى التليفزيون او فى الجرايد
طبعا لا بس الدعايه بتاعته بتبقى فى النطاق بتاعه
ازاى
الدعايه بتاعته حتلاقيها من اول الاكياس اللى كاتب عليها اسم المحل ودى دعايه مهمه على فكره لان فيه ناس كتير مش بترمى الكياس
وحتلاقى الدعايه دى برضه قائمه الاسعار اللى حاططها بره
وكمان فى يافطه المحل وساعات فى اليفط الصغيره ( اسمها فوانيس ) اللى بتلاقيها على قمه الشارع
نروح برضه لمثال كمان حلو
الدكتور
من المعروف ان اى دكتور لما بيفتح عياده بيعتمد اكتر على مهارته علشان ده يجيبله الزباين
يعنى بيعمل دعايه بمهارته
بس مش بيعتمد على مهارته بس ليه
لانه لو كان بيعتمد على مهارته وخبراته بس مكانش كتب اسمه على الروشته اللى بيديهالك
ومكانش كتب اسمه على اليافطه بتاعه العياده
ومكانش عمل لنفسه كروت شخصيه
ومكانش عمل لنفسه اعلانات فى الشوارع
بالتالى يا جماعه
الفكره اللى عاوز اوصلهالكم
ان اى حد بيقوم بنشاط مهما كان النشاط ده صغير بيحتاج للدعايه جدا
عاوز اوصلكم فكره ان اى حاجه عليها اى اسم لاى محل او اى منتج دى عباره عن دعايه
مهما كان المحل ده صغير ومهما كان المنتج مش مهم ومهما كان اللى بيعمل الدعايه ده مشهور اساسا
قيس كل الكلام ده على كل محل بتشوفه فى الشارع
وكمان قيسه على عيادات الدكاتره ومكاتب المحامين وشركات الكمبيوتر
ومراكز التدريب والمعاهد واى حاجه فاتحه علشان تكسب فلوس
فهمنا كده بقى يعنى ايه اعلان
نروح بقى لانواع الاعلانات
انواع الاعلانات كتيره اوى يا جماعه ومتشعبه وقابله للتطوير فى اى وقت وممكن اى فكره بسيطه تبقى اعلان ويكسر الدنيا
وانواع الاعلانات هى:
1- الاعلانات المطبوعه : وهيا دى اللى بتهمنا فى الاساس وتشمل اعلانات الصحف والمجلات والدوريات والمنشورات والملصقات
2 - الاعلانات الخارجيه : وهى اعلانات الشوارع والمعارض والاعلانات اللى على العمارات وعلى الاتوبيسات
3 - الاعلانات المسموعه : وهى الاعلانات الاذاعيه
4 - الاعلانات المرئيه المسموعه : وهى اعلانات التليفزيون ودى المنتشره اكتر وكمان فيه اعلانات السينيمات
5 - الاعلانات على شبكه الانترنت : ودى مكنتش موجوده قبل كده وظهرت مع تطور عالم الانترنت وزياده اعداد المستخدمين
وعلى فكره حنعرف بعد كده ان اعلانات الانترنت مهمه جدا جدا
6 - الاعلانات على الموبايل: ودى برضه ظهرت بعد زياده مستخدمين الموبايل
دلوقتى يا جماعه انتوا كده اخدتوا فكره عن الاعلان وانواعه
نيجى بقى للجزء اللى يهمنا وهو عن الخدمات اللى بتقوم بيها مكاتب الدعايه والاعلان
وانا اقصد المكاتب العاديه مش الوكالات الكبيره لان دى شغلها كبير اوى وعلشان توصلها لازم تاخد الخبره العمليه فى المكاتب العاديه
مكاتب الدعايه والاعلان العاديه بتشتغل فى
الكروت الشخصيه
الورق المطبوع ( فلاير)
اليفط بانواعها ( البنر والفيلكس والفنيل)
الاكياس المطبوعه
النتائج والاجندات المطبوعه
الاوراق والسجلات التجاريه ( طباعه دفاتر وفواتير التجار والشركات وروشتات العيادات وفولدرات المحامين )
تصميم مواقع وصفحاب الويب ( وده مش كل المكاتب بتشتغل فيه)
دى يا جماعه الحاجات اللى بتشتغل فيها مكاتب الدعايه والاعلان علشان يبقى عندكم فكره وكمان ان شاء الله فى الدروس اللى جايه حناخد الحاجات دى
بالتفصيل الممل من اول فكرتها وكيفيه تصميمها بسهوله وفى اسرع وقت ولغايه طبعها
وملحوظه هامه جدا قبل ما انهى درس النهارده
اهم حاجه بتهم شركه الدعايه فى المصمم اللى شغال انه يكون سريع بمعنى انه لما يتطلب منك تصميم كارت شخصى المفروض
مياخدش منك اكتر من عشر دقايق او ربع ساعه بالكتير وفى نفس الوقت يكون التصميم كويس
وخلى بالكم ده شىء مش صعب ولا مستحيل لان الاستخدام التجارى للفوتوشوب غير الاستخدام الابداعى
بمعنى ان المكتب مش بيطلب منك تطلع ابداعاتك كلها فى التصميم كل اللى بيتطلب منك افكار وتصميم كويس وخلاص
علشان كده لما واحد فيكم يشتغل مع الوقت حيلاقى نفسه بيصمم بسرعه وهوه مغمض
انا عن نفسى اول ما بدأت اشتغل فى المجال ده كنت باصمم الكارت الواحد فى حوالى ساعه
دلوقتى الحمد لله فى خلال الساعه دى اقدر اصمم خمس كروت وممكن اكتر
ومعلش يا جماعه الموضوع دلوقتى كله نظرى بس زى ما قولتلكم ده تمهيد مهم جدا لابد منه وان شاء الله فى الدروس الجايه حتعرفوا اكتر اهميه الدرس ده
واشوفكم الدرس الجاى ان شاء الله
واللى عنده استفسار يقول وانا ان شاء الله حارد بسرعه على قد ما اقدر
والسلام عليكم

السلام عليكم ورحمه الله وبركاته

اعرفكم بنفسى الاول
انا شريف من الاسكندريه طالب بكليه الحقوق وشغال فى مجال الدعايه من حوالى ثلاث سنوات
طبعا فيه منكم اللى يعرفنى من موقع الدى فى دى لان موضوعى ده اول ما كتبته كنت كاتبه هناك
لكن طبعا الواحد عرف بعد كده انه لازم يكون ليه قدر من الاستقلال وانه ميخضعش لمشرفين اى منتدى طالما ان موضوعه حصرى
فى المدونه دى لو انت مهتم بمجال الدعايه والاعلان ونفسك تشتغل فيه ومعندكش اى خبره بتاتا يبقى ده مكانك الصح
لانى هنا حاخدكم من اول السلم خالص لحد ما تبقى مصمم محترف ان شاء الله
فى المدونه دى حيبقى فيه سلسله دروس وفيه تطبيقات ومتابعات مع الزوار لان التعليم هنا حيبقى تفاعلى مش نمطى
تابعوا دايما معايا واعرضوا تطبيقاتكم
وواحده واحده مستواكم حيتطور وحتوصلوا لمرحله انكم تشتغلوا فى اى شركه دعايه واعلان محترمه
وبالتوفيق للجميع ان شاء الله