أساسيات تصميم اليفط الإعلانية
بسم الله الرحمن الرحيم

نتوكل على الله ونبدا درس النهارده
تنبيه مهم فى السريع على اللى اخدناه قبل كده
اول درس اتكلمنا فيه عن مفهوم الدعايه
تانى درس اتكلمنا عن درجه مهاره الفوتوشوب المطلوبه للمصمم فى الدعايه
ثالت درس اتكلمنا عن تصميم الكروت الشخصيه
رابع درس اتكلمنا عن الكروت الشخصيه برضه
النهارده بقى حنتكلم عن اليفط
ايه هيا اليفط وايه اهميتها
طبعا اليفط دى عباره عن الاعلان الثابت اللى بيعبر عن نوع النشاط اللى بيمارسه صاحب اليافطه
اهميتها طبعا انها بتعمل دعايه لصاحب النشاط فى دائره نشاطه
يعنى انت مثلا نزلت الشارع بالليل بتدور على سوبر ماركت وكل الناس قافله
لكن لمحت من بعيد يافطه منوره مكتوب عليها سوبر ماركت
يبقى حتروح عليها على طول
يبقى كده الراجل صاحب السوبر ماركت استفاد من اليافطه
مثال تانى برضه
يافطه عياده دكتور
انت رايح لعنوان عياده دكتور واول مره تروح ولسه حتدور على مكان العياده
وانت واقف فى الشارع لقيت يافطه مكتوب عليها اسم العياده اللى انت بتدور عليها
يبقى كده اليافطه دى سهلت عليك انك تدور كتير
علشان كده اليفط مهمه جدا لاى صاحب نشاط
ولا غنى عنها
مفيش حد بيفتح محل او مكتب او شركه الا واول حاجه بيفكر يعملها هيا اليافطه
عرفنا خلاص اهميه اليفط
نيجى بقى لانواع اليفط
اليفط تلات انواع
فيلكس وبانر وفنيل
الفيلكس دى عباره عن الخامه الجلد اللى بيتطبع عليها التصميم وبعد كده بتتشد على بوكس خشب وجواه لمبات علشان تعمل يافطه مضيئه
البانر بقى عباره عن الخامه الجلد اللى بيتطبع عليها التصميم برضه بس مش بينفع يتحط وراها لمبات وبتتعلق عادى
الفنيل ودى اليفط اللى مش بتتصمم بالالوان مثالها العادى قائمه الاسعار
احنا اللى يهمنا دلوقتى الفيلكس والبانر
لا وكمان دول مش مهمين
لان لما بيتطلب منك تصميم يافطه انت مش بيبقى ليك دعوه اليافطه دى حتتطبع فيلكس او بانر انت اللى يهمك تصممها وحكايه طباعتها لاى نوع بترجع للمطبعه مش ليك
معنى كده ان التصميم واحد لاى من النوعين دول
نيجى بقى لحته تصميم اليافطه
اولا انت بتشوف المقاس المطلوب كام
يعنى مثلا لو 2 متر فى 1 متر
بتفتح صحفه جديده فى الفوتوشوب مقاس 200 سم فى 100 سم
الجديد بقى
ان الريزليوشن بيبقى 72 بيكسل فى الانش
72 مش 300 زى الكروت
فيه حاجه مهمه لازم انبه ليها برضه
ان فيه ناس كتير بتقول انهم يصمموا اليافطه على مقاس صغير عادى وليكن مقاس الكارت وبعد كده يكبروها على المقاس الكبير
طبعا الكلام ده غلط
اليافطه بتتصمم على مقاسها الاصلى والريزليوشن الاصلى علشان تطلع كويسه فى الطباعه لكن لما تيجى تصممها على مقاس صغير وتكبرها بعد كده ابقى اتفرج عليها حتبقى عامله ازاى فى الطباعه
اوك عرفنا المعلومه المهمه دى
نيجى بقى لنقطه مهمه جدا
ان المصمم اللى اول مره يصمم يافطه
اول حاجه بتواجهه
انه بيقول ازاى اعرف ان اسم اليافطه اللى حاكتبه حيطلع كبير لما اليافطه تتطبع
انا باقول ان اسم اليافطه ده هوه المؤشر اللى عن طريقه حتوزع بقيه البيانات وتظبط حجمهم
اولا تكتب اسم اليافطه وليكن زيرو نت زى ما انتوا شايفين فى اليافطه اللى تحت
تكتبها بمقاس كبير وبعرض اليافطه
فيه لوجو للمكان زى اللى فى اليافطه يبقى تحطه برضه بمقاس كبير لان اللوجو مهم جدا لصاحب المكان
ثانيا: تكتب بيانات اليافطه بمقاس اصغر شويه من اسمها وتوزعهم بشكل حلو حسب ذوقك وتحاول على قد ما تقدر يبقوا واضحين ( تحطهم فى مربعات دواير مثلثات تطلع نور منهم اتصرف)
ثالثا: اهتم اوى بالصور لان الصور دى اول حاجه حيشوفها الناس قبل البيانات وكمان بتدى شكل لليافطه
يعنى يفطه زى اللى قدامكم فيها صور لالعاب زى ما انتوا شايفين
الفكره بقى اللى فى اليافطه دى اللى عاوزكم تاخدوا بالكم منها
انهم مقسومه نشاطين
اول نشاط اللعب والنت
وتانى نشاط الكمبيوتر والتجميع
علشان كده لاحظوا ان تم الفصل بين النشاطين بشكل لذيذ
معملناش خط علشان يفصل بينهم
لا جبنا صوره كمبيوتروكتبنا اسم المكان تانى بس جمبه كلمه كمبيوتر وفى مربع ومع شكل الكمبيوتر الحلو بقت ملفته
وبرضه حطينا صور للوجوهات ماركات كمبيوتر
بس كده
وادى الشكل النهائى

تصميم اليفطه بسيط وسهل ومفيهوش حاجه
طالما انتوا عديتوا من مرحله الكروت الشخصيه حتبقى اليفطه سهله بالنسبه لكم
طبعا اليفط عاوزه شغل اكتر شويه من الكروت بس برضه سهله وبسيطه وبتتعمل على حسب دماغ الزبون
جه زبون عاوز يافطه مليانه وفيها صور اولاده وصورته هوه وصور كتير اوى للنشاط اللى حيعمله
نفذ كلامه وهوه حينبسط اوى من اليافطه حتى لو كان التصميم مش عاجبك
جالك زبون تانى عاوز يافطه شيك وبسيطه وبتعبر بابسط شىء عن نشاط المكان
ابقى مخمخ فيها وخلى اليافطه كلاسيك على قد ما تقدر
عامه اليافطه زى الكروت بتتنفذ على حسب دماغ الزبون
وده اللى عاوز اوصلهولكم بالنسبه لشغل الدعايه
انت بتصمم اى حد على حسب دماغ الزبون مش على حسب دماغك انت
فمش مهم انت مقتنع بيها ولا لأ انا مش بقولك امسك المايك وغنى
افتكر دايما ان التصميم اللى بتعمله ده للزبون مش ليك فلازم يكون على مزاجه هوه حتى ولو انت مش مقتنع بيه
لان اقتناعك مش مهم لاغلب الزباين اهم حاجه هما يقتنعوا وعندهم حق فى النقطه دى لان الزبون هوه صاحب النشاط وهوه اللى حيدفع والتصميم ده ليه هوه يبقى انت مش متحمل حاجه بعد كده
فيه مصممين بيقولوا لأ انا معملش تصميم وحش من وجهه نظرى علشان الزبون عاوز كده
انا باقولهم متبقاش تكتب اسمك على التصميم الوحش وابقى اكتبه على التصميم الجامد
وزى ما قولت قبل كده يا جماعه
مكاتب الدعايه دى مجرد بدايه
بعد كده لما تاخد خبره جامده فى المجال ده حتقدر تشتغل فى مكاتب للتصميمات بس
المكاتب دى اللى مش بتطلع اى تصميمات
ساعتها حتلاقى اللى انت عاوزه وحتلاقى ان المطلوب منك تصميمات نضيفه
ارجو ان المعلومه دى تكون وصلت لكم
نيجى بقى للجزء اللى مش بتحبوه
Home work
مطلوب تصميم يافطه لمحل بيع اجهزه كمبيتور
اسمه المحل
turbo
النشاط: بيع اجهزه كمبيوتر كامله
بيع مكونات كمبيوتر
بيع شاشات مستعمله
شراء مكونات الكمبيوتر المستعمله
المطلوب صور لكومبيوترات ولوجوهات ماركات كومبيوتر والكلام ده واليافطه تكون غامقه شويه
المقاس اللى عاوزكم تصمموا عليه انا مش عاوز مقاس كبير
عرض 9 سم وطول 5 سم زى الكارت وريزليوشن 300 عادى
ارجو يا جماعه ان اللى يدخل يعمل تطبيق ويوريهولى علشان انا بازعل لما مش بالاقى تطبيقات لانى باحس انى باكتب على الفاضى ومفيش حد استفاد
وخلى بالكم انتوا اخر درس ضحكتوا عليا وكنت عاوز تطبيقين مفيش غير اتنين هما اللى عملوا التطبيقات وكل واحد فيهم عمل تطبيق واحد من الاتنين
بس ماشى حنعديها المره دى
مستنى تطبيقكم واسف انى اتاخرت فى الدرس ده بس ان شاء الله الدرس الجاى مش حيتاخر طالما انتوا بتطبقوا

والسلام عليكم ورحمه الله وبركاته


13 comments:

  1. Anonymous on 21 August 2008 at 04:08

    السلام عليكم

    فى الحقيقة عندى سؤال بخصوص البانر و اليفط خاص بالريزوليوشن و الصور

    اولا ليه ريزوليوشن 72 مش 300

    ثانيا
    بالنسبة للصور اللى بشوفها محطوطة على بانرات او فليكس مثلا زى بتاعت مول سان استيفانو

    حجم الصور كبير جدا و بالتالى لو انا استخدمت صور بريزوليوشن 72 زى اللى اتنت مستخدمها فى المثال بتاعك فى تصميم زى ده.. اكيد حتبكسل لما تتشد على المساحة اللى احيانا بتصل الى 3 متر فى 2 متر

    فى سيديهات و مواقع بتبيع صور بجودة عالية خاصة للطباعة مش لشغل الكومبيوتر على المونيتور

    ممكن يا شريف توضح لى مسألة اختيار الريزوليوشن بتاع الصور فى اعمال اليفط بيتم ازاى ؟

    الف شكر

    مؤمن

     
  2. Sherifer921 on 29 August 2008 at 19:04

    اولا انا اسف جدا يا مؤمن انى اتأخرت عليك فى الرد بس انا لسه شايف الكومينت بتاعك دلوقتى حالا
    ثانيا بقى ندخل فى المهم
    بالنسبه للبانر واليفط
    الريزليوشن 72 مش 300 لان الريزليوشن ده عباره عن كميه النقط فى الانش او السنتى الواحد يعنى يا اما 72 نقطه فى الانش او 300 نقطه فى الانش
    طبعا المطبوعات العاديه علشان حجمها بيعتبر صغير وبتطبع بواسطه مكن طباعه اوفست ف بتحتاج تاخد اعلى جوده طباعه فبالتالى بنخلى الريزليوشن بتاعها 300
    بالنسبه للبانر مينفعش يبقى 300 لان معنى كده ان التصميم فى الطباعه حيطلع الوانه تقيله اوى ومش واضح لو شوفته من بعيد جدا بعكس لو كان 72
    --------
    بالنسبه للسؤال التانى
    انا جاوبت عليه فوق
    ان اليفط مش مطلوب منك انك تشوفها وجها لوجه
    و وجها لوجه دى يعنى انك يبقى بينك وبينها 5 سم مثلا لانك ساعتها حتشوفها مبكسه
    لكن لما تشوفها من بعيد حتلاقيها بالصوره اللى انت بتشوفها بيها دلوقتى دى
    بعكس لو كانت 300 عمرها ما حتكون واضحه ليك خالص من بعيد
    يوم ما تيجى تصمم اى يافطه صمم على ريزليوشن 72 لان ده المتعامل بيه عالميا سواء فى تصميم اليفط او فى مكن طباعتها
    واتمنى انى اكون افادتك
    وفى انتظار اسئله تانيه منك وشكرا

     
  3. Anonymous on 30 August 2008 at 04:29

    السلام عليكم

    الف شكر يا شريف على اجابتك بس معلش استحملنى شوية
    دلوقتى فى الوصلة دى لموقع لمشهور للصور - اى ستوك فوتو- لو بصيت على الصور حتلاقى اكتر من مقاس لنفس الصورة

    http://www.istockphoto.com/file_closeup/actions/5617265-girl-in-a-field.php?id=5617265


    وصولا الى حجم 30 سم فى 20 سم تقريبا
    برضه فى الموقع ده
    http://www.gettyimages.com/

    تلاقى ان ابعادصورة مثلا كالتالى :

    47.5 MB / 16.64 x 11.09 in. (4992 x 3328 px) / 300dpi

    طيب انا افتح ملف بالابعاد المطلوبة على ريزوليوشن 72

    ماذا عن ريزوليوشن الصورة نفسها ؟ برضه 72 ؟

    و الاحجام الكبيرة بتاعة الصور دى بيكون ايه استخدامها ؟

    برضه بالنسبة لطباعة الفينيل او ما شابه مش برضه دى بتشغل برزوليوشن 300 زى البرنتر العادية؟


    الف شكر

    مؤمن

     
  4. Sherifer921 on 30 August 2008 at 15:55

    السلام عليكم ورحمه الله وبركاته
    بص يا مؤمن علشان انت شكلك مهتم اوى باليفط الاعلانيه
    انت لما تيجى تصمم يافطه
    تفتح الصفحه الجديده على الفوتوشوب ب ريزليوشن 72 عادى جدا
    مش مهم بقى الصوره الاصليه تكون ريزليوشن 300 او لأ بس الاحسن ان الريزليوشن بتاعها يكون 300 علشان لما تتحط فى الصفحه اللى الريزليوشن بتاعها 72 تبقى كويسه نوعا ما
    بالنسبه بقى لمواقع الصور
    الفرق طبعا بين الصور اللى حجمها كبير واللى حجمها صغير بيفرق جدا فى تصميم المطبوعات العاديه اللى الريزليوشن بتاعها 300 و 350
    لان الصوره اللى الحجم بتاعها كبير بتبقى احسن من اللى حجمها صغير وكمان اوضح فبالتالى تطلع واضحه اوى فى الطباعه وجودتها عاليه بعكس اللى حجمها صغير علشان كده بتلاقى المواقع دى بتبيع الصور اللى حجمها الكبير بمقابل نقدى لان المصممين فى امريكا واوربا بيحتاجوها علشان الشغل يطلع مظبوط بعكسنا هنا فى مصر مش بنشترى حاجه وبنتصرف بالصور المتاحه المجانيه
    طباعه الفنيل بقى
    لازم تعرف ان الفنيل انواع
    يعنى مثلا لو فنيل عادى اللى هوه بيبقى كلمه بس
    ده مش محتاج ريزليوشن فى حاجه
    دى كلمه وبتتقص على شكلها وخلاص
    لو الفنيل اللى هوه الوان
    يبقى الريزليوشن 72 برضه
    اتمنى اكون افدتك يا مؤمن
    وبرضه انا جاهز لاى اسئله تانيه
    اسال دايما علشان تتعلم

     
  5. Anonymous on 5 September 2008 at 15:04

    السلام عليكم
    اولا الف شكر على الشرح الجميل و ممتاز موضوعك الجديد المركز عن الطباعة الخارجية اوت دور.
    ثانيا كل سنة و انت طيب بمناسبة رمضان.

    اعتذر عن تأخرى فى الرد و ان شاء الله لينا قاعدة تانية بس بعد نصف رمضان

    كل سنة و انت طيب و الف شكر

    مؤمن

    :)

     
  6. Anonymous on 30 October 2008 at 01:41

    السلام عليكم ورحمة الله وبركاته
    اولا بشكرك على مجهودك وربنا يجعله فى ميزان حسناتك
    ثانيا كان عندى استفسار بسيط
    فى اليفط الكبيرة دى احيانا بنحتاج صورة تكون بحجم كبير وللاسف بتكون مش متوفرة مثلا مطلوب صورة عروسة على مقاس 85سم فى 175 سم طول
    ومش عارف اعمل ايه كل الصور الى بلاقيها صغيرة وبتبكسل فى الحجم ده ارجو الافادة وشكرا

     
  7. Anonymous on 5 September 2010 at 04:38

    ربنا يكرمك
    تسلم ايدك انا بشتغل فى شركة دعايا واعلان وبتعلم من الناس اللى معاسا واتعلمت من حضرتك كمان
    مشكور
    دمت لنا
    العصفورة الحزينة

     
  8. eslam esso on 3 December 2010 at 09:50

    نسلم ايدك انا بجد استفدت من الموضوع ده انا اسلام تصميم فوتو شوب وصناعة افلام واعمال مونتاج وقريبا دعايا واعلان

     
  9. magdygabril on 13 April 2011 at 23:19

    http://www.4shared.com/photo/BL_rb0f4/M1_2.html

    ارجو التقييم

     
  10. Anonymous on 1 February 2012 at 08:09

    مشكوررررر على هذا المجهود الرائع

     
  11. كليه الحقوق on 16 October 2012 at 13:40

    مشكوووووووووووووووووووووووور جدا على مجهودك ووفقك الله لما فيه الخير والصلاح
    محمد مصطفى

     
  12. Anonymous on 31 December 2012 at 21:18

    مشكووووووووووووووووور على مجهودك الرائع

     
  13. Unknown on 1 December 2018 at 07:22

    شكرا علي مجهودك وشرحك